Гӏалгӏайчен яхархочунна ца доагӏаш газах хьатеха ахча тӏера дӏадаьккхар
Гӏалгӏайчен квартире яхача кхалсага бокъонаш меттаоттайир, из сага бокъонех волча викалга леткъачул тӏехьагӏа. Шийна ца доагӏаш газах декхар оттадаьд, аьнна, дийцар цо, цул тӏехьагӏа из цун тӏера дӏадаьккхар.
«Цу кхалсага хоам бир, дӏадахача шера лайчилла бетта «Газпром межрегионгаз Назрань» ООО шийгара ца доагӏаш хьатеха декхар дӏадехаш моттиг хилар, аьнна. Газацара таронаш лоаттаеча организаце яхачул тӏехьагӏа, цунга аьлар, газ мел йоагаяьй хьагойташ болча гӏирса ха чакхъяларах хьаӏайна декхар да из, аьнна.
Бакъда цун счётчика ха чакхйоалаш яцар 2027 шера мара. Гӏирсага хьажа баьхкача болхлоша аларах, цу кхалсага счётчик хийцар. Цул тӏехьагӏа цо цу компане мел деш хинна дехар теркалдеш дацар. Цул совгӏа, судо хьадайтача каьхата тӏа белгалду, квартира чухьнахьарча газа гӏирса технически гӏулакх дара договор дац, аьнна. Бакъда цу кхалсагага из договор долаш да», - аьлар «Сердало» газетага ГӏР УПЧ хоамий-аналитически даькъ тӏа.
Сага бокъонех волча викала цу гӏулакха материалаш дӏаелар Гӏалгӏайчен Госжилинспекце. Дӏабихьача тӏахьожама балхо хьагойтар, газа гӏулакха болхлоша, из мах оттабеча хана, счётчика тӏара таьрахьаш теркал ца деш дита хилар. Тӏахьожама болх лелабераш юкъебаьнначул тӏехьагӏа, газаца ӏалашо лоаттаяра болхлоша счётчика хьагойташ дола хоамаш дӏа а лоархӏаш, харцахьа хьатеха ахча юха лаьрхӏар. Цу кхалсага тӏера беррига бехк дӏабаьккхар, цун лицевой чота тӏара 170 эзар сом декхар дӏадаьккхар.
