Мефедрон йохка гӏийртар дӏалаьцар ӏаьдала болхлоша
90 грамм совгӏа дола мефедрон яха «дохьаж» дохка гӏийрта Наьсарера яхархо дӏалаьцар вай мехкарча МВД болхлоша. Из хоам «Сердалога» бир цу моттигера.
«Вай мехкарча наркотикашта духьала болх лоаттабеча МВД оагӏон болхлошка хоам бера, 2025-ча шера ӏан хьалхарча бетта 11-ча дийнахьа РФ УК 3-ча даькъа 30-ча ст., п. «г»; 4-ча даькъа 228-ча ст. гӏулакх хьадийллача шин сага даьча зулама юкъе 1991-ча шера яь Наьсарера яхархо а я, аьнна. Хьалхагӏа РФ УК 3-ча даькъа 234-ча ст. бехктокхаме эза хиннай из», - йоах тхога бенача хоамо.
Шоашца хьаж йоаха жӏалеш долаш, цун цӏагӏа чухьожаш хиннача МВД болхлошта каьхата юкъе хьоарчаяь 0, 52 гр. мефедрон корайир. Цул совгӏа, цӏагӏа дӏачувоаллача хьалъэлла иллача зизай кхабилга чура ӏаьржача килёнка чу йоаллаш цӏаькха а 93, 99 грамм мефедрон корайир. Еррига наротик ӏаьдало дӏаяьккхай. Наьха ираз доадеш, йӏаьхий хила яьллар набахта йоалл карарча хана. Набахтен низткъа мара сердал чу ца кхетача корах арахьежаш, шортта ха хургья цунга ше лелаяьча нах ӏазапе увттабаьча базара уйла е.
Наркомани яхача зулама духьале лоаттаяр тахан эггара лоархӏамеча гӏулакхех да. Вайна ховш да, цу бӏехача гӏулакхо сага ираза никъ хоадабелга, цудухьа моллагӏа тешаме доаца хӏама теркалдича, ӏаьдалга хоам бе беза ӏалаьмате чехка.
