Гӏалгӏайчен бахархошта хьалхадаьккхар, нувхаш ӏоаеш хиларо ӏалама доккха зе деш хилар
Гӏалгӏайчен ӏалама Министерствос беча хоамага гӏолла хьалхадаьккхар Гӏалгӏайчен бахархошта, ца йоагӏача моттиге нувхаш ӏокхувса йиш йоацилга. Цох хоам бир «Сердало» газетага ӏалам лорадераша.
«Цу тайпара нувхаш хилар бахьан долаш, доккха зе ду ӏалама. Нувхаш йоагаеча хана, сага могашала а зе деш бола бӏеха кӏур а, дохьаж а михаца хьадахь, цул совгӏа цунца цхьана даржаш хул дийнаташ, лазараш, цар телхаю доазон кеп»,- аьлар министерствос, ше беча балха йоазон тӏа.
Бахархой декхар да шоай нувхаш контейнерашка йита, лаьрххӏа цу гӏулакха кийчъяь я из моттиг. Нагахьа санна йоккхий хӏамаш хилча, масала гӏишлон даькъ тӏа, уж дӏаяхьа еза ТКО лаьрхӏа йолча моттиге. Цу хьакъехьа нах шоаш хила беза сакхетам болаш. Гонахьарча ӏалама зе ца деш, из лорадар вайх хӏаранех тийша да.
Нагахьа санна ца йоагӏача нувхаш ӏокхувсаш воаллаш шоана саг бӏаргагой, цох сиха хоам бе беза ГӀР ӏалама Министерстве укх телефонах: 8 (8734) 55-45-78 е хоам дӏабахьийта беза электронни почте гӏолла mpr_rӏ@maӏl.ru.
Законах гӏод тоха дезаш да ӏалам толхадара. Къаьстта бехке волча сагагара цох гӏод доаккхаргда 6 эзар сом, нагахьа из балха тӏа вола саг вале - 60 эзар сом, юридически - 700 эзар сом. Цул совгӏа цар дӏаяха езаргья шоаш ӏокхийса нувхаш.
Миччахьа дӏа а йихьа, нувхаш ӏокховсара тӏера болча наха гӏод тохаргда 50 эзар сом, 80 эзар сомага кхаччалца гӏулакхерча наха, 120 сомага кхаччалца юридически наха. Цар иштта шоай кисара дӏалургда республикан экологена хинна зе.
«Хӏара вахархочун бокъо я дика экологически хьал леладе, бакъда нувхаш ӏокхувса бокъо яц цхьанне а!» - хьалхадоах ГӀР ӏалам лорадара Министерствос.
