Бахархошта товргйола болх бе моттигаш могаергья ярмарке
«Россе болх. Аьттоний ха» яхача Ерригача Россе ярмаркага гӏолла, болх бе моттигаш могаергья вай мехкахошта. Из хоам «Сердалога» бир Мехкадаь зарбан болх лелабераша. Укх бетта 17-ча дийнахьа, нийсса итт сахьатагара ворхӏ сахьат даллалца, хургья ярмарка укх адресах: Наьсаре, Коталон урам, № 58.
«Таханарча дийнахьа эггара лоархӏаме йолча моттигашка болхлой лахар да – лораш, хьехархой, инженераш, иштта кхыйола говзал йола къахьегамхой. Мехкарча цхьацца болх лелабеча моттигий хьал теркалдеш дӏахьош ба из болх», - белгалдир вай мехкадас Келаматанаькъан Махьмуд-ӏаьлас цу гӏулакхах дувцаш. Мехка кулгалхочо теркалдир, из болх боаггӏача боараме, хӏаране хьашташ кхоачашдеш, дӏахо бувзам хила йиш йолаш, дӏабахьа безилга. Ший начӏалга, говзалга хьежжа болх бе моттиг кораяр чӏоагӏа лоархӏаме да хӏара сага. Укх шера наха болх бе моттигаш ӏалашъеш йолча ярмарке 230 тайпара оагӏонаш довзийтаргда.
Дарбанчешка, дешара оагӏонца, промышленносте, паччахьалкхен моттигашка къахьегаргдола нах ба безараш. Вакансешта юкъе – эпидемиолог, педиатр, психотерапевт, психиатр-нарколог, анестезиолог-реаниматолог. Иштта кхыйолча моттигашка тахан эш керттера метролог, мехкдаьтта база кулгалхо, экономиках, рузкъах йолча моттига кулгалхо, иштта кхыбараш а.
Дешара оагӏонца геттара эшаш ба тахан физиках, математиках, филологех бола хьехархой, иштта федеральни оагӏонцара ӏаьдала болх лелабе нах эш. РФ кхыйолча миӏингашка 10 000 болх бе моттиг я бахархошта. Болх бе моттигаш луча нахаца къамаьл де, моллагӏа хӏама тахка, дашха аьттув ба бахархой.
