Кредиташца тийшаболх кхостабарах, бехктокхаме озаш ва мехка вахархо
40 шу даьнна Илдарха-Гӏалий тӏара вахархо бехке веш гӏулакх хьадийллар шахьарерча СКР тохкамхоша. Кредиташца тийшаболх кхостабарах РФ УК 3-ча даькъа 159.1 ст. бехктокхаме озаш ва из. Из хоам «Сердалога» бир мехкарча Тохкама оагӏон викалаша.
«ӏаьдала болхлоша белгалдечох, 2024-ча шера лайчилла бетта, ший мобильни оагӏонга гӏолла, кредит эца безам болаш, ши дехар чуденнад цо. Ше вахаш йола моттиг, иштта хӏара бетта хьатӏадоагӏача ахчах бола хоам харцахьа оттабаьб цу сага, шийна болча аьттонна. Цо хьатӏадайтача каьхатех банко 2, 2 млн сом ахча дӏатӏадахьийтад цун банковски карта тӏа.
Кредит дӏачутелара болх геттара дика чакхбоаккхаш ва аьнна шийх алийта, хьалхарча массехк бетта ший ханнахьа дӏатийннад цо банка ахча, цул тӏехьагӏа Арбитражни суде ше къевалар белгалдеш дехар чуденнад.
Банкера хьаийца кредит ший дега ма тов дехкад, говзал кхостаяь, аттача ахчанца ший гӏулакхаш дӏадерзаде ваьллачо. Банка цо даьр доккха зе да», - дийцар «Сердалога» цу моттигера. Цу гӏулакхах болх дӏахьош ба тахан мехкарча Тохкама оагӏон къахьегамхой. Харцача наькъаца ший хӏама тоаде веннар, боаггӏача боараме бехктокхаме озаргва.
