19 шу хьалха Россе Турпала цӏи елар Келаматанаькъан Ӏалихана
19 шу хьалха, 2007-ча шера лайчилла бетта 4-ча дийнахьа Россе Президента чӏоагӏонца Россе Турпала цӏи елар лакха майрал, денал гойташ вахар хаьдача ФСБ подполковника Келаматанаькъан Макшарипа Ӏалихана. Боккхача мехка кхерамзле лораяра тӏехьа ший декхараш лакхача боараме кхоачашдеш, мехках дог лазаш, хьинаре къахьийга воӏ вар ала деза цох!
1969-ча шера бекарга бетта 18-ча дийнахьа Шолжа-Шахьаре ваьвар ӏалихан. Къона волаш Гӏалгӏайчен Паччахьалкхе хьаотташ хиннача шерашка, мехка хӏама тоадара тӏехьа дакъа лоацаш хилар из. Хӏаьта 2000-ча шера денз, Россе ФСБ балха тӏа волаш, Къилбаседа Кавказе къаьстта лоархӏаме, кхераме лоархӏаш дола декхараш кхоачашдеш лаьттар из. 2007-ча шера тов бетта 17-ча дийнахьа Наьсарен кхален Гӏааьзе-Коа, бӏехача зуламхоша кӏийле яь даьча довнах вахар хаьдар деналах визза хиннача цу къаман эздийча виӏий.
Тахан боккхача мехка тайп-тайпарча моттигашка лакхача безамца лоархӏаш я цун цӏи. Шолжа шахьарера №4 йола ишкол, иштта Магасерча урам цун цӏи лелаеш ба. Самарерча бульварах тиллар вай къаман эпсара цӏи, хӏаьта юриста говзал караерзаеш цо дешаш хиннача Самарски паччахьалкхен университете мемориальни улг оттадаьд. Цун цӏера хетаяь эллиной-румий оалача латарах йола Ерригача Россе яхьаш дӏакхухь вай республике хӏара шера.
Боккхача мехка, къаман исторе массахана йовзаш хургья денал, яхь, майрал йолаш ваьхача Келаматанаькъан Ӏалихана цӏи.
Дала гешт долда, Дала къахетам болба цох!
