Келаматанаькъанвар: 20 тонн гуманитарни мухь дӀахьоргба ГӀалгӀайчера СВО доакъашхошта
АргӀанара гуманитарни новкъостал дергда кастлуш Россе Донбасс лораеш дӀахьош йолча лаьрххӀача операце дакъа лоацаш болча СВО доакъашхошта лаьрхӀа, яхаш, дийцар ший телеграм-канале мехка кулгалхочо Келаматанаькъан Махьмуд-Ӏаьлас.
«ГӀалгӀайчера новкъостал дахьийадар цига дӀадахача шера а. Иштта карарча шера а новкъостал лоаттаде лаьрхӀад. ХӀанз дӀаяхьийта кийчъяьй 20 тонн. БӀухошка дӀакхоачийтаргда докъадаь дулх, дашаделла дулх, баьцадаараш, молаш дола хий, тӀадувхаду барзкъа, цӀенонна лаьрхӀа гӀирс, молхаш, иштта кхыйола хӀамаш. Вай укхазара хьож бӀухой могашал лорае, уж берригаш а биза, шоашта тӀехьа доал деш, цӀагӀарбараш дага ца боахкаш хилар ловра, укхаза хьеж, уж котало яхьаш цаберзарга», - яздаьд цо.
ГӀалгӀайчера баха СВО доакъашхой, мехка Герзашцарча низий министерствос Ӏалашо еш бале а, цӀагӀара яйтача хӀамо санна йӀовхал лургьяц цо, ший тайпара дега йӀовхал луш хул цӀагӀара дена совгӀат, аьнна, белгалдаьккхар ГӀалгӀайчен Кулгалхочо. Иштта терко лоаттаю цар дезалашта а. Духхьал моттиге царна еш йолча терконна юкъедодаш да 20 совгӀа хьашташ кхоачашдара хама.
«БӀухошта а аттагӀа да, шоаш хьаллоацаш хилча. Цо дегаш ураоттаду вай Даьхе лораеш латтарий», - тешаш ва Келаматанаькъан Махьмуд-Ӏаьла.
