ГIишлой балхах йолча министерствон кулгалхочун гIонча волча Леонтьев Сергейс яхачох, цигара еха гIишлош тоаеш болх дIахьоргба эггара хьалхарча юхьанца» ,  —  йоах тхогарча хоамо. Ишколаш тоаеш, тIайоагIача шелала кийчо еш, къахьега деза цу шахьаре. «Тахан йоккха хало я цу нахага.

Тоаде дезаш доккхий котёлаш, газ лоаттаю котельнеш. Из болх дIабахьа беза ишколе, шин берий беша, берий санаторе, поликлинике. КIор боагабеш я цигара хьаькъал эшаденнача унахой дарбанче, цигара котёлаш а да тоаде дезаш. Таханарча дийнахьа цу шахьарерча хьакимаша ехар я кирпишк, цIеро боагабеш боаца топпар — 3 тонн.

Цу кхоачамах пешкаш е лерхI цар, гIишлошка йIайха хургйолаш», — аьлар Леонтьев Сергейс. Мехкадас Келаматанаькъан Махьмуд-Iаьлас белгалдир, Токмакски района новкъостал дергда, аьнна, чIоагIо яьяр вай республико, хIаьта хIанз из гIо де ха хьаэттай.

Запорожски областанна чуйодача Токмакски кхален эшаш дола новкъостал де хьажа деза вай, дуккха низ Iобилла. Дукха ха йоацаш тIом лаьттача моттиге бахаш болча наха, геттара дукха эш. Эггара хьалхарча аргIагIа, гIишлош меттайоалае гIо де деза вай»,   — аьлар Мехкадас. Кулгалхочо белгалдир; вай республика цу дог ийшача, тIемо човхабаьча нахага хьожаш, цар вахар аттачахьа доаккхаш хургья, аьнна. ГIишлош тоаеш мел эшаш бола кхоачам Iокхоачаргба вайцигара Токмакски кхале, ер бутт юкъекхаьчача. Вай мехкара цхьаькха доккха дика хургда из!