«Пайда ийцача токах, ахча хьагулдара болх кхыча тайпара дӀакхахьа доладелар тхо. «Къилбаседа Кавказа россетий» -«Ингушэнерго» яхача оагӀонца цхьана дӀахьош болча балхо дикка эргадаьккхар гӀулакх. Ах миллиард совгӀа шоашта тӀалатта декхар дӀаденнад бахархоша. Декхар дӀателаш боацарашца, наӀар тӀа ухаш, цу хьалаца дувзаденнараш ма дарра царна дӀахайташ болча балхо тоадир из гӀулакх. Из болх дӀачӀоагӀбеш латт тахан», - белгалдир вай мехкадас Келаматанаькъан Махьмуд-Ӏаьлас, цу гӀулакхах дувцаш.

Республикан кулгалхочо дийцар, декхар дӀатела раьза боацарашца, уж дерригне дух тӀа боахаш, хьаийдеш дола ахча республикера тока хьал тоадеш, тишденнар хувцаш дӀаухийташ долгах уж дӀакхетабеш, болх дӀакхахьар лоархӀаме долга. Массайолча моттигашка боаггӀача боараме ток дӀакхоачаргйолаш, керда трансформатораш оттаеча лоархӀаме да, хӀара сага шийна тӀалатта декхар ханнахьа дӀадалар.

Цул совгӀа, ток, газ, хий мах боацаш доадеш дац, ханнахьа ахча дӀателаш, лораде дезаш гӀулакх да из. Декхар хьаӀоадича, ший хьал халача доаккх сага, цул дикагӀа да, дӀадаланза даргдоацаш, хьайна тӀалатта декхар ханнахьа дӀатакхар.