Мехкарча таьрахьашца дувзаденнарий Академе шу дизар дездеш хургба республике
Тов бетта 5-ча дийнахьа таьрахьашца дувзаденнарий Академе шу далар дездеш хургба Магасе. Цу дийнахьа арахецаргба « 21 Ишколе» дийша баьнна ИТ-говзанчаш. Цу гӏулакхо хьагойтаргда, лоархӏамеча дешара моттига шера мел хӏама карагӏдаьннад. «Сердалога» из хоам бир мехкарча Паччахьалкхе.
ИТ-оагӏонца къахьега, доккхача толамашка кхача кийча болча «21 Ишколе» дийша баьннарашта сертификаташ дӏалургда цу дийнахьа, боккхача наькъ тӏа баьнна гӏа баккха кийча хиларца даькъалабувцаш. Кхетачен программан юкъе лоархӏаме дакъа дӏалоацаш хургда, говзанчаша хьакхеллача хьаькъала вай вахарера моттиг йовзийта къамаьл. Доакъашхошта лаьрхӏа кхерамзлен хетаяь балхацара сессеш хургья цига; иштта ИТ-тоабан доал дар, ший моттиге гаьнаваьнна лакхвалара гӏулакх довзийтаргда. Шоай вахар технологешца хотта ловчар аьттув хургба Академе дешара программа, «21 Ишколе» деша оттарца дувзаденнараш довза. Цу оагӏонцарча боккхача говзанчаша дувцаргда шоай балха тӏа шоаш теркалдаьрех, пайда хиннарех.
Спикераш болаш, къамаьл дергда цига ИТ-моттигий болхлоша, иштта шоай гӏулакхе толамга кхаьча йолча технически тоабаша. Лоархӏаме хьаьший болаш тӏаэцаргба цига «21 Ишколе» дийша баьнна, дикка гаьнабаьнна, мехка йоккхача технологически моттигашка къахьегаш бараш. Технологей дуне довзийташ, вӏаший пайда эцаш, кердадараш доаржадеш моттиг хургья цох.
