Юрта спектакль гойтар кагирхой театра актёраша
29.09.2023 08:23
СоагӀапчара бахархой болча баха хилар вай кагирхой театра актераш. «Хьамсара нус» яха комеди йихьар цар шоашца цигарча наьха дог гӀоздаккха. Цу комеде дувц маьр-наннеи несийнеи юкъера гӀулакх. Юртарча культуран цӀагӀа гулбелар комедега хьажа ловраш.
«Шоай мел дола гӀулакхаш дицденна, чӀоагӀа самукъадаьлар юртарча наьха цу комедега хьежача. Лакха начӀал гойташ, шоай болх дӀабихьар актёраша. Къаьстта белгала вар къаман гӀорваьнна артист вола Йовлой Ахьмад. Къавенначул тӀехьагӀа къонвала гӀерта воккха саг Ӏаббас вар цо юхь ловзаеш хиннар», - дийцар тхога юртарча культуран цӀагӀа.
