Республике керда ишколаш хьалъеш латт
16.11.2023 10:09
Мехкарча шахьарашка, юрташка хьалъеш латт керда ишколаш. 420 бера моттигаш хургйола беркате ишкол хьаелларгья кастта Йоккхача Ачалкхе. «Дешар» яхача къаман проектага гӀолла, дӀахьош ба из беркате болх. Из хоам «Сердало» газетага бир гӀишлой балхах йолча министерстве.
«Цу юрта керда ишкол эшаш йола дукха ха яр. Цигара ши ишкол берех хьалйикъа латт, дӀачубаха цхьаькха ишкол ца хиларах. Цул совгӀа, цхьадолча берий чӀоагӀа гаьна дӀааха дезаш хул. Беркатеча къаман проектага гӀолла кастта аттачахьа даргда берий, хьехархой гӀулакх», - белгалдир гӀишлой гӀулакхах йолча министерстве.
ДӀадахача шера аьхки дӀаболабаьб из болх. Таханарча хано дӀадеххача тайпара, мел эшар чудолаш, хургья керда ишкол. ХӀара болх ше-ший аргӀагӀа дӀахьош боахк болхлой.
