Арендах квартираш хьаэцара е уж ший доалахьа хургйолаш эцара хьал мехка гIолла регионашка массехк хувцалуш ханаш хиннаяле а укх шера итта бетта йола ха хьаийцача, ГIалгIайче гIолла кIезиг-дукха хувцалуш дале а, юкъара хьаийцача кхы меттахьа даьннадац ала йиш йолаш да.

Цунна тешалду тха «Сердало» газета корреспондента республика йиъ районе дIабихьача хаттарий балхо.

Цу тайпара, Магасе арендах квартираш дIалуш бола мах ба 18 — негара 22 эзар сомага кхаччалца бетта йолча хана. Из кIеззига дукхагIа мах ба дIадахача 2021 шера арендах луш хинначул.

Цу моча квартирах дукхагIа мах боаккх нагахьа из денна-бийсана йолча хана дIалаьрхIача, хIана аьлча денна-бийсана чуIерг бола мах ба 2,500 сом хIара дийнахьа. Бокъонах, цу тайпара арендах дIаяла хьож арендателаш, цхьаннегара пхе суткага кхаччалца йолча хана хургйолаш, кхы дукхагIа йоацаш.

Квартирах дIадахар меттаоттадеш йола ханаш Назране, Шолже, МагIалбике гIолла хьажача цунах бола нийса хоам бац. Из хоам селлара баьржа а хилац наха юкъе, хIана аьлча уж селлара дукха а яц цу тайпара пайда бахьаш йола квартираш.

Эггара дукхагIа арендах квартираш дIалуш йола моттиг ГIалгIай Республике гIолла хьаийцача Магас, хIана аьлча хIара шера республике хьаухаш бола туристаш а хьаьший а совбоалаш латт, из дувзаденна да зIамигача бизнесаца, шоай балха хьалаш вIашагIдохкаш хиларца.