Вай армрестлераша Россе Хьалхле къайсача толам баьккхар
ГIалгIайчен гулъяьча команданна чубоагIача армрестлераша вай республика дикача оагIорахьа гойтар, цар пхиъ майдилг яьккхар армрестлингах йолча Россе Хьалхле яккхара яхьашка, яхаш, дийцар «Сердало» газетага ГIалгIай Республикан спорта, физически культуран Министерствон зарбан болх лелабераша.
«Яхьашка дикагIа бола толам гойтар 60 кг дозал долча Котанаькъан Iадрахьмана, аьрдига кулгаца дошо, аьттигаца дото совгIат даьккхар цо. Цул совгIа, двоеборьех, судахоша лаьрхIар Iадрахьмана лакхара совгIат - дошув доагIа, аьнна.
ШоллагIа моттиг яьккхар 90 кг дозал долча Беканаькъан Уматгире. КхоалагIа моттиг кхаьчар 65 кг кхоачаш дозал долча Булгучанаькъан Амина. Уж Iомабу болх дIахьош, царна кулга деш хилар Тимарзанаькъан ИбрахIим, Котанаькъан Хьусен.
ГIалгIайчен гулъяь команда накъайоаккхаш вар ГIалгIай Республика армрестлинга Федераце президент Котанаькъан Хьусен, ФА вице-президент Тимарзанаькъан ИбрахIим», - аьлар хоамо.
Белгалду, Орёл яхача шахьаре тушола бетта 12-ча денгара 16-ча денга кхаччалца дIахьош хиннача Россе Хьалхле яккхара яхьашка дакъа лоацаш хилар 50 моттигера спортсменаш. Уж бар 14 шергара 23 шерга кхаччалца ханаш йолаш. Орловски областа физически культуран Депортамента доакъашхоша яьхачох, иштта дукха спортсменаш цига цIаккха а хиннабацар.
