Дохк латтача наькъашка лоралуш хила, яхаш, кхайкарал ду мехкахошка
ЦӀаьхха, хаоттам хувцабенна, наькъашка дикъа дохк оттарах тарра; лоралуш, фийла хила, яхаш, кхайкарал ду МВД болхлоша машенашца леларашка. Из хоам «Сердало» газетага бир наькъашкара хьал лорадеча болхлоша.
«Къаьстта дохк латтача хана, наькъашкара хатараш дукхагӀа хул, цудухьа боккъал а лоралуш, машенаш сиха ца лехкаш лела, яхаш, кхайкарал ду ГИБДД болхлоша, шоай хоамашка гӀолла. Ший вахар, уллуврча наьха вахар лораде, хила тарлуча хатара уйла е декхарийла ва хӀаравар!», - йоах тхогарча хоамо.
Иштта дохк эттача хана, хьалсегаш йола лампаш согаш; эшаш хуле, хатар хилча лотаеш йола сигнализаца лотаеш, цу мугӀарера кхыдараш юкъедоаладеш, дӀаваха веза новкъа водар. ЧӀоагӀа фийла хила беза гӀаш лелараш а!
Бокъо йоацача, шоашта дагадехача моттиге дехьа ма дувла, дохк латтача хана шоашта гонахьардар зувш хила. Уж деррига хӀамаш лораде декхарийла ва хӀара саг.
