Туристашта лаьрхӀа тоаергья Хаьни яха лоаман моттиг
Республикера лоаман моттигаш туристашта лаьрхӀа тоаяра тӀехьа йола респбликан бокъо кхаьчар, Хоаной тайпан овла болча лерхӀаме хӀамаш карахдувлача Пхьарчанаькъан Ӏалаудина. Эггара хьалха, лоаме хьалваха, тайпан къоаношца дагаваьлар из, проект дӀахьокхаш. Деррига тахкачул тӀехьагӀа цар соцам бир, Хоаной лоархӀаш долча лаьтташка туристашта хьатӀааха моттиг тоаяйта.
Из хоам «Сердало» газетага бир ЖӀайрахьа кхален администраце. Диазза вӀаштӀардаь хьаший цӀа, ресторан хьалъе лаьрхӀа ва цига ший ахча дӀадохийтар. Белгалде деза, къаьнарча хана вай даьша еш хиннача гӀишлошта тара хургйолаш из хьалъе лерхӀилга.
«Кирпишкаши, тахан техкаш дола тховнаши хургдац укхаза. Вай гӀалашта тара йолаш гӀишло хургья из. Дикка къахьийгача, тристашта тӀалатта боккъал башха моттиг е йиш я вай гӀалай доазонашка.
Хоаной тайпо тахан хьалхара гӀа боаккхаргба из доккха гӀулакх кхоачашдеш. Кхыдола тайпаш а тхошта тӀехьа оттаргда аьнна хет сона, иштта болх дӀахьош. Керттердар- боаггӀача боараме дӀакхетабе беза нах цу балхах», - аьлар Пхьарчанаькъан Ӏалаудина.
