«Вай къаман юкъе массахана хиннаб турпалаш, хург а ба, Даьла низаца! Хьоашаланаькъан Султана, Цхьорой Мухьмада, иштта кхыболча вай къаман сийдолча къонгий цIераш хезача, дега боккха тоам хул. Дийша болаш, хьаькъал долаш, шоашта тIадехка декхараш нийса, дизза кхоачашде ховш болча цар хам баь варгвац! Уж ба вай боккхача мехка турпалаш», — белгалдир Мехкадас.

«ТIема декхараш дика довзаш волча цун кхы а кхоъ Денала орден я. ХIанз цун луш я йиълагIа орден. ЧIоагIа дега тоам хилар сона, цунца къамаьл деш. Иштта, деналах, эзделах бизза болча къонгий белаж тIа латт вай къаман сийле. Моттийта, даьсса къамаьл, гIулакхаш леладерех вац из саг.

Ший мохк безаш, цун сий лораде кийча волаш, ший декхараш токхаш латт. Иштта бола къонгаш вай къаманна юкъе мел болча хана, хIара денна тоалуш дIагIоргда вай гIулакхаш, Даьла къахетамца», — теркалдир Мехкадас. «Могаш волаш, иразе, беркате хилда хьа а, хьо санна къаман гIулакха латтача вай къонгий а вахар», — аьлар республикан кулгалхочо, цунна ловца боаккхаш. Таханарча дийнахьа а, хьалха дIаяхача хана санна, боккхача мехка сий лорадеш латт, дуккха бола эздий къонгаш. Маьрша, могаш болаш; цIенах кхеталба уж берригаш а!