Вай мехкарча шахьарий, юртий хьал тоаде аьнна; 145,5 млн сом ахча хьахьожадаьд
Россе Президента Путин Владимира чӏоагӏонца юкъеяьккха вахарера гӏулакхаш тоадарах йола къаман проект я, мехка йоаржаеш. Укх шерарча программанна юкъеяхача 24 моттигех 20 моттиге болх чакхбаьккха баьннаб. Юхейисача йиъ моттиге болх тӏатеӏӏа дӏахьош ба тахан, оагӏой бетта 1-гӏа ди тӏакхачале йистебаьнна хила безаш ба из.
Вай мехкадас Келаматанаькъан Махьмуд-Ӏаьлас белгалдечох, программе чудодаш дола рузкъа 145, 5 млн сом да, лайчилла бетта 10-ча дийнахьара хьал теркалдича, 95,9% ахча балхах дӏадахийтад. Наьсарера, Магӏалбикера, Илдарха-Гӏалий тӏара, Шолжа-Шахьарера, иштта юрташкара урамаш, сквераш, гӏашлой наькъаш тоадеш дӏадахийтад рузкъа. Магасерча йиъ моттигера болх чакхбаьккха бала боахк болхлой, 90%-га кхоачаш кийча я ала йиш я уж моттигаш.
Наьсарера парк тоаеш дӏахьош латтар, 111, 6 млн сом ахча дӏалаьца, боккха болх ба, таханарча дийнахьа кхоачашдаь гӏулакхаш 82%-га кхоачаш да ала йиш я. Дезалашца арабаьнна паргӏатта салоӏаш ха дӏаяхьа аьттув хургба бахархой кастта.
Вай мехкадас Келаматанаькъан Махьмуд-Ӏаьлас теркалдечох, 2019-ча шера денз, президентски къаман проектага гӏолла вай мехка тоае аьттув баьннаб 254 моттиг, цу юкъе я укх шерара проекташ а. Республикан кулгалхочо белгалдир, из деррига наьха хьал аттачахьа доаккхаш, царна паргӏато еш долга.
