Вай мехкара 200 совгӏа дукха бераш дола ноаной ханал хьалха пенсе бахар
Вай мехкара кхоъ е дукхагӏа бераш дола ноаной, ханал хьалха пенсе бахийтар. Хӏанзолца къоастаяь хиннача ханал хьалха пенсе баха, балхара цӏагӏа саца аьттув болаш хул дукхача дезала ноаной. «Сердалога» из хоам бера мехкарча Россе Вахара оагӏонцарча ганзера.
Балхара цӏагӏа ӏийна, пенсе баха аьттув хилар бераш дукха хиларга хьежжа да. Кхаь бера нана пенсе яха йиш йолаш я 57 шу даьлча, диъ бер кхедераш – 56 шу даьлча, хӏаьта пхиъ е дукхагӏа бераш дараш 50 шерга кхаьчача балхара салаӏа йиш йолаш ба.
Ханал хьалха пенсе бохийтаргболаш къаоастадаь цхьаццадараш да. Эггара хьалхарча оагӏонца, хӏара бер бархӏ шерга кхаччалца леладаь хила еза нана. Масала, цӏагӏа кхо бер дале, царех зӏамагӏа долча бера ялх шу мара даьннадаце, пенсе яха аьттув ши шу даьлча хургба цун. Шоллагӏа-дале, эггара кӏезигагӏа 15 шу болх баь стаж хила еза наьна, 30-нел лохагӏа йоацаш пенсионни коэффицент а.
Лоархӏамеча кердадарех да, 2026-ча шерарча наджгоанцхой бетта 1-ча дийнахьа денз, бера цхьа шуи ах шуи даллалца цунга хьожаш яьккха ха стажа юкъе йодилга. Дукха бераш долча ноаношта стаж дукхагӏа хилар аьттув болаш хул.
«Дезал» яхача къаман проектага гӏолла бераш долча дезалашта гӏо деш ба Россе мехкарча Вахара ганзе. Ший стажаца, пенсионни коэффиценташца дувзаденнараш тахка йиш я тахан Госуслуги яхача портале гӏолла.
