«Из болх дӀахьош, болама доакъашхой массехк бӀаь га дӀаегӀа а Ӏергбац, иштта цар хьунашка лостам бергба, дӀаегӀача кагийча гаьнашта Ӏунал дергда. Карарча шера ардара бетта кхоалагӀча дийнахьа хьу меттаоттаяра болх дӀабахьа лерхӀ», — аьлар ГӀалгӀай Республикан Ӏалам лорадераша. ХӀара саг, ший хьамсарча мехках дог лазаш вар, цига дакъа лаца йиш йолаш ва. Ӏалама министерствос кийчъергья гаьнаш дӀайогӀара эшаш йола техника, гӀирс, хоам бергба мичахьа, маца дӀахьоргья экологи Ӏалашъяра моттиг. ГӀалгӀай Республикан Кулгалхочо белгалдир, цу балха лерхӀам боккха хилар. «Сона хетачох, «Лораергья хьу» яхача боламе дакъа лаца деза ГӀалгӀайчен берригача бахархоша, зӀамига гаьнаш дӀайогӀача уж хила беза, вай хьу меттаоттаярах дог лазаш хила беза. Вай мехкара экологически хьал тоадара эшаш да из», — аьлар цо. Келаматанаькъан Махьмуд-Ӏаьлас хьалхадаьккхар, хӀара сага шийгара цу даькъ тӀа новкъостал деш хиларо таро хулийтаргья, тӀехьа тӀадоагӀача ноахала дика тӀехьале йита. Иштта мехка бахархой бокъо йолаш ба; мичахьа, малагӀча доазон тӀа фу хилча шоашта бакъахьа хет ала.