90% бахархоша белгалдечох, нувхаш дIаяхара гIулакх эггара лоархIамечарех да
Балха моттигашта, бахархошта хьалхашка лоархIамеча гIулакхех цаI хинна дIаэттад, ханнахьа нувхаш дIакхахьар. 100 сагаца къамаьл деш, оаха дIабихьача хоаттама балхо хьахьекхар из.
«Юрташка, шахьарашка нах дукхагIа хулаш латт; хIара денна тикашкара, базар тIара цхьацца хIамаш ийю вай, тIормеш дизза. Деррига цхьалхадаьккхача, боккха гув нувхаш, кIопилгаш юс царех. Нувхаш сихагIа ший цIагIара дIаараяха гIерт хIаравар. Вай теркалду, нувхаш дIакхувса бакаш шоай ханнахьа дIа ца кхайсача, деррига гонахьара доазув бIехдеш, нувхаш дIа-хьа яржилга», - дийцар Наьсарерча цхьан вахархочо.
70% бахархоша яхачох, наха каст-каста хьалхадаха деза, нувхаш къоастам беш дIакхувсара гIулакх. 65% наха белгалдир, гонахьара Iалам, хиш, хьунаш царна зе деш йолча нувхех лораяр вайх хIаране декхар долга. Массане аьлар, кхаьч-кхаьчача нувхаш йоаржаерашта гIод детта деза, аьнна.
