Ши кӏира совгӏа ха я, Эсо вихьа саг лохаш латта
05.08.2026 13:03
Эса чу вайна саг лохаш дукха адам оарцагӏдаьнна, болх дӏахьош латта ши кӏира совгӏа ха я. МЧС болхлой, шоай мел бола низ ӏобилла, хин моттигаш тохкаш ба тахан. Цу гӏулакха арабаьхаб эггара говзагӏа бола цу оагӏонцара къахьегамхой.
«23 МЧС болхло, ялх машин я араяьннараш. «Тӏаргим», «Эрши», «ӏарамхи» яха МЧС тоабаш я болх дӏахьораш. Низ дӏа ма кхоачча къахьегаш ба уж, саг лохаш», - йоах «Сердалога» МЧС хоамо.
Оалкамара ӏоболабенна Мужеча кхаччалца, хин моттигаш тохкаш латт тахан. Хи чу ӏочулийга яда гаьнаш юстарйоахаш, кӏотаргашка, хин кӏалха хьожаш ба уж.
Хий сов хьийдда, шийла доагӏаш хиларо ма хетта дӏабахийтац из болх, хӏаьта а ди-бийса ца къовсаш из саг лохаш да адам.
