«ЛоархIамеча кхетаче дакъа лоацаш вар ГIалгIай Республикан унахцIенон министр Балай Мухьмад-Башир кхетаче дIаяхьар вIашагIделла Паччахьалкхен Дума депутат Татринаькъан Муслим, социальни политикан, унахцIенон комитета кулгалхочун гIонча Олиганаькъан Бадрудин, моттигерча доал деча даькъ тIарча администрацеца, къаман политикаца, юкъарлонца, дина организацешца бувзам лелабара йолча комитета кулгалхочун гIонча Къоастой Ахьмад, кхыбола цу гIулакхаца хьашт дола нах», — аьннад хьабайтача хоама тIа.

Белгалду, паччахьалкхен наркотикашца къовсам лоаттабара йола политика кхоачашъеш, керттердар — наха юкъе наркомани хургйоацаш болх дIабахьар.

Из деррига а хьаде йиш йолаш да, лерттIа тIахьожам лоаттабеш хуле, наркотикаш лелаяра, уж йохкара, наха юкъе йоаржаяра бола болх хила боагIача тайпара вIашагIбелла хуле.

Цул совгIа, наркоманашта, уж меттабоалабара дола лорий новкъостал лоаттаде деза, кхыдола цу унзарча зулама духьалара наькъаш леха деза. Къамаьл дераша белгалдир, шоашта цу зуламца къовсам лоаттабара дича бакъахьа хетар. Белгалдир, ГIалгIай Республика Парламенте, бокъонах доагIаш дола наькъаш лахара, терко еш хилар.

Иштта Халкъа Гулламе цу хьакъехьа лаьрххIа дувца дага ба, наха эггара доккхагIдола зулам деча цу лазара духьала къовсам лоаттабара никъ тохкаш.