Вай мехкахочо Ерригроссе яхьашка дошо мейдилг яьккхар
19.10.2023 09:41
А. Жилетежевах болча дагалоаттама хетаяьча ондаргашта юкъерча ГӀаьбартой-Балкхарой столице дӀахьош хиннача Ерригроссе яхьашка, дошо мейдилг яьккхар МагӀалбикерча къонача спортсмена, «Вольник» яхача клуба викало, ГӀантамаранаькъан Мухьмада.
Нальчике яхьаш дӀайихьар шин дийнахьа. Мейдилгаш яхара яхьеваьлар 180 спортсмен. Уж бар Россе 17 моттигера 21 шерга кхаччалца ха яьннараш. Турнире дакъа лоацаш хиннараш бар; Ерригроссе а, халкъашта юкъерча а яхьашка дакъа лоацача хана дукхаза котбаьнна хинна спортсменаш. Вай спортсмен ГӀантамаранаькъан Мухьмада 125 кг дозал дарашца диазза летар, из хилар цу дозалах дикагӀчарна юкъе. Дошув даккхара яхьашка ваьнна гӀалгӀай спортсмен латаш хилар Селий мехкарча, Къилбаседа-ХӀирийчен, Нохчий Республикан спортсменашца. Юххера а, Къарший-Черсий спортсменагара, чот 7:1 йолаш, котало яьккхар вай мехкахочо», - аьлар «Сердало» газетага ГӀалгӀайчен спортивни латара федераце.
