ГӀалгӀайчен шахьарашка, юрташка хьакхоллаш да спортивни вахар
«Спорт - вахара боарам», «ДегӀаахар» яха проекташ кхоачашъеш, спортивни вахара моттигаш хьакхол ГӀалгӀайчен юрташка, шахьарашка, яхаш, дийцар «Сердало» газетага ГӀалгӀай Республикан кулгалхочун зарбан болх лелабераша.
«Уж деррига хьалаш хьалхарча аргӀагӀа вай берашта, уж лерттӀа дегӀадоаладара эшаш да. Вайна эш могаш йола, низ бола, хьаькъал дола къона тӀехье, цар ГӀалгӀайче шоай дикача гӀулакхашца дегӀайоалаергйолаш. Цхьабараш хӀара денна Ӏомабала аха безаш ба. Из бахьан долаш, тӀехьара тӀа цар наькъа дӀадода ахча, бакъда массане а яц цу тайпара таро.
Цудухьа тха безам ба, хӀара юрта, гаьна ваха ца везаш, спортивни гӀишлош хилийта», аьлар республикан кулгалхочо Келаматанаькъан Махьмуд-Ӏаьлас, мехка спорта гӀишлой балхах дувцаш. Хоам бу, 2025 шера Дошалкъий-Юртарча даькъ тӀа спортивни гӀишлон хьалхара корпус хьалъергья.
Республикан гӀишлонна лаьрхӀа лаьттан чӀегилг хьакъоастаяьй. Юрта бахаш ба карарча хана 13 эзар совгӀа нах. Укхаза бахача наха лаьрхӀа болх беш я пхи ишкол, шиъ берий беш, амбулатори.
Шоай ханнахьа ГӀазе-Юртарча, Сурхо тӀарча спортивни ишколашта лаьрхӀа доазув хьакъоастадаьд, хӀаьта Буро кӀалха, хӀанз укх сахьате, хьалъеш я ФОК, цун керттера дакъа кийча да.
Цул совгӀа, Шолжа-Шахьаре 2024 шера спорте дакъа лоацаш хила таро хургья дукхача наьха, цигара наӀараш хьаелларгья кастлуш. Деррига юкъара де лерхӀаш дола балхаш хьаийцача, 2030 шерга кхоачаш, 70 спортивни гӀишло хьалъе лерхӀ берий-ондаргий спорт кердача программах дегӀайоалаяра.
Цу физически культуран, спорта хьал-тароно дукхача шерашка ГӀалгӀайчен эзараш болча бахархой могашал тоаергья.
