Гӏалгӏайчен викалаш дакъа лоацаш ба къаман цхьоагӏон кхетачене
Москве, Ерригроссийски «Цхьана хилар: паччахьалкхе, бизнес, юкъарло, цхьоагӏо лораяра» яха къаман цхьоагӏон кхетаче йолаш, говзанчий дагабалар хилар. Говзанчашта юкъе дакъа лоацаш вар Гӏалгӏайчен Миннаца кулгалхо Мизенаькъан Руслан. Цига дувца оттадаь дош дар паччахьалкхен структураша, коммерчески доакъоша, юкъарлон цхьанкхетараша юкъара болх, пайда эцаш, дӏабахьарца дувзаденна хаттараш кхоачашдар. Говзанчаша, викалаша дийцар лоархӏаме вахара проекташ дӏаяхьарах, республикан культуран, этнически мах бараш лорадарах, иштта къамашта юкъера бувзам чӏоагӏбарах.
«Кхетаче дӏаяхьар лоархӏаме дар шоайла балха говзал эцара, Россе къамий цхьоагӏо, барт чӏоагӏбара. Къаьстта йола моттиг дӏалоацаш да наьна мотт, ӏадаташ, къаман мах бараш лорадар, иштта республикай гуманитарни бувзам чӏоагӏбар», - аьлар «Сердало» газетага Мизенаькъан Руслана.
Сессе говзанчаша, викалаша чӏоагӏдир; шоайла балха даькъ тӏара бувзам лелабаро, таронаш, профессиональни говзал, ӏаьдала оагӏорахьара коммерчески моттигаш, бахархой юкъарло хьаллоацаш хила таро лу, аьнна.
Къамаьл деш хиннараша аьлар, из хаттар массайолча оагӏорахьара чулоацаш, хӏара боахамо белггала дола декхар тӏаэцаш хиларо, таро лургья дика пайда луш дола балха хьал юкъедаккха. Цу тайпара проекташ юкъейоахаш хилча, РФ моттигашка керда таронаш хьаелларгья, царна новкъостал деш экономически, культуран, вахара хаттараш кхоачашде.
Цул совгӏа, цига дакъа лоацаш хиннараша белгалдир, цу тайпара бувзам лелабаро дикагӏа пайда луш хилар. Болх цхьана дӏахьош хилча, моттигера хаттараш а дикагӏа кхоачашде могаргда; паччахьалкхен болхлоша шоайла, нахаца, юкъарлонца тешаме болх лелабергба.
