Къамий цхьоагӏон Ди дездергда вай мехка
Къамий цхьоагӏон Ди дездеш хургба Шолжа-Шахьаре лайчилла бетта 4-ча дийнахьа. Къамашта юкъерча доттагӏала, машара, бувзама моттиг хургья цу дийнахьа шахьара керттерча доазонах. Тайп-тайпарча къамий ӏадаташ, гӏулакхаш, истори довзийташ йола йоккха программа я кийчъяьр. Къамий культурай, тайп-тайпарча кулгаговзала фестиваль йоаржаергья из доккха цӏай дездеш.
Вай мехкарча тайп-тайпара хӏамаш шоай кулгашца хьаеча пхьараша вай ӏадаташца бувзам бола кӏувсаш, кeцала лелаю хӏамаш, дахчанца, аьшкаца даь говза балхаш довзийтаргда цига гулбеннарашта. Иштта къамий дувхар а довза йиш хургья цӏай дездеча моттиге. Лакха начӏал долча вай пхьараша гойтама балхаш дӏахьоргда цига, моллагӏча сага дакъа лаца йиш йолаш.
Лоархӏаме моттиг дӏалоацаш хургда цига вай къаман тайп-тайпара дола чаме, беркате даараш: гӏалгӏай цӏихеза чӏаьпилгаш, сискал, иштта кхыбола кхача а. Цул совгӏа, вай мехка бахаш болча кхыча къаман наха а довзийтаргда шоай ӏадаташцара даараш.
Къамий спортацара яхьаш а йоаржаергья цига. Къаьнарча хана денз хинна Даькъастен ловзараш хургда цига, хӏаравар ше-ше котвала гӏерташ. Из цӏай дездеш, доккха концерт кийчдаьд цу гӏулакха хьалхаэттараша.
