Цига дакъа лоацаш хилар: ГIалгIай Республика Парламента депутат Дибаранаькъан Мухьмад-Сали, Къоастой Ахьмад, республика тIема комиссар Местой Тимур, ГIалгIай Республика салтий даьй комитета кулгалхо Саганаькъан Руслан.

«Патриотизм — вай вахаре халанза даргдоаца мах бар да, из кхетам луш кхеде деза вай тIехь тIа доагIа ноахал, вай даьхе чIоагIъеш», — аьнна белгалдир Парламента депутаташа.

Кхетаче дIахьоча юкъе дийцар, региона бахархошта тIема-патриотически кхетам баларах, тIема службе баха гражданаш кийчбара хьакъехьа луш бола кхетам лакхбе безаш хиларах.

«Ишколашка ОВС кабинеташ материально-технически кийчъяь хила езарах дувцаш, хьехархоша-предметникаша белгалдир, дешара технически хьалаш ца хиларах лаьца, герз нийса тоха Iомабаларах, тираш оалача кепара уж Iомабарах, е цу тайпара бола кхетам луш бола болх дIабахьара моттигаш ца хиларах, дешара-материальни лард ца хиларах дийцар цар дIахо.

Из хаттар депутаташа шоай теркаме ийцар.

ГIалгIай Республика Халкъа Гуллама бюджеташ, йоалах волча кулгалхочо Дибаранаькъан Мухьмад-Сале хоам бир, ГIалгIай Республика 110 ишколашка дешара материально-технически база ца хилар дуцаргда 2023-ча шера, иштта 2024-2025-ча шерашка республика бюджет дIа-юха хьожадеча хана», — аьнна белгалду хоамо.

Берригача доакъашхоша цига терко тIаяхийтар дар, берашта юххьанцарча классашка дагIача хана денз, даьхе езара чам чубоссийта беза, аьнна.

Хьалхадоаккх, 2021-ча шера цхоалагIча сентябре денз, Российски Федераце ишколашка лаьрххIа патриотически кхетамбалара лард чIоагIъяьй. Стандарто нийсса аьлча, гражданско-патриотически, духовно-нравственни, эстетически, физически, къахьегама, экологически кхетам балар юкъедоаладеш да дешара. Цу тайпара луш болча кхетамо таро хулийтаргья: дешархой даьхенцара безам совбаккха, Россе моттиг йовза, цунна исторически оагIонаш дикагIа йовза, цунна доазув довза.