Бераша дакъа лаьцар, «НачӀал дарашта никъ ле 2023 шера» яхача фестивале
01.11.2023 12:42
Из цӀи йолча Х-ча мехкашта юкъерча, Шолжа-ГӀалий тӀа дӀайихьача берий кхоллама фестивале-яхье Илдарха-ГӀалан культуран цӀагӀа цхьацца говзал Ӏомаеш бола Чуранаькъан Луиза, Ӏамархананаькъан Мухьмад котбаьлар, хӀаьта шоллагӀа моттиг яьккхар Баьтаранаькъан Хьавас. Цу яхье дакъа лаца бераша дика кийчо яьяр, начӀал долча хьехамчас - халкъа артиста Хулаганаькъан Артура кулгал деш.
«Берий кхоллама къовсам хетабаь бар цӀихезача композитора, дирижёра, хьехархочун, музыкальни юкъарлон болхлочун Хачатурян А.И. 120 шу дизара, цу дикача кхоллама проекта кулгал деш хилар В. А.Татаева цӀерагӀча культуран, искусствай Нохчий паччахьалкхен колледжа директор йола ЗубайраевгӀар Анжелика.
Яхьаш йийкъаяр шин даькъа:
«Инструментальни говзал», «Илли алара говзал». Доакъашхой кхаь даькъа бекъабелар, шоай ханашка хьежжа. Яхь чакхъяьлча, кхелахоша котбаьннараш хержар», - аьлар «Сердало» газетага Илдарха-ГӀалан культуран цӀен кулгалхочо Овшанаькъан Къамбулата.
ГӀалгӀайчен къонача викалаша гойтача говзалах ховш да, уж мел чӀоагӀа начӀал долаш а ший болх дика бовзаш вола хьехамча шоашта керте латташ а ба.
