«Сердало» яхача КЦӀ кулгалхочунна, «Магаса 30 шу дизар» яха майдилг елар
ГӀалгӀайчен столицан 30 шу дизар белгалдеш да. Магаса мэре гулбир Ӏилман, дешара, культуран тайп-тайпарча моттигашкара викалаш. Магаса мэра Орцханаькъан Зайта дӀахьош яр лоархӀаме кхетаче, хьабаьхкача хьаьшашта юбилейни майдилгаш елар цо, лаьрххӀа столицан 30 шу дизарга хьаяь яр уж. Дагалоаттама совгӀат делар «Сердало» яхача Кепайоазон ЦӀен кулгалхочунна Курскенаькъан Хадижата, из йийхаяр цу кхетаче.
«Шух дукхагӀбараш, Магас-Шахьар хьакхеллача денз, республика дегӀайоалаяра даькъ тӀа къахьегаш хьабоагӀа, дика дакъа лаьцад вай столица дегӀайоалаеча а. Укх цӀай долча дийнахьа, шоана хӀаранена баркал ала лов, оаш Магаса а ГӀалгӀайченна а даьча диках. Оаш, лакха балха говзал йолаш, лаьрхӀачунга кхача гӀерташ, хьийга къа зехьа дайнадац»,-аьлар Орцханаькъан Зайта, ше кхетачен доакъашхошца къамаьл деш.
Россе карта тӀа Магас яьлар 1994 шера бекарга бетта 15-ча дийнахьа. Тахан из хьакимаш багӀа, Ӏилман а культуран а юкъара моттиг я. Из хоза архитектура, къаман белгало йолаш шахьар я. Укхаза цахаддаш хьалдеш латт цӀенош, наькъаш, вахара, спорта гӀишлош. Къаьнара Алане столица меттаоттаеш латт бахархошта гуш, уж доккхал деш хьеж вай Маьлха шахьар дегӀайоагӀаш хиларга.
