Мехкара дизайнераш, къахьегама тоабаш къаман преми къовсача дакъа лоацаш ба
«Россе толашагӏа йола промышленни дизайн» яхача къаман премена юкъе дакъа лоацаш ба вай мехкара цхьацца моттигашкара болхлой, дизайн-студеш. «Сердалога» из хоам кхаьчар мехкарча Паччахьалкхера.
2027-ча шера наджгоанцхой бетта 29-ча денга кхаччалца чутела йиш я дехараш. Промышленни дизайна, российски кхоачама хӏама хьаллоацаш дӏахьош я уж яхьаш. Массадола хӏама теркалдеш хургба проекташ хоржараш, цу юкъе да хӏама дика, боаггӏача боараме хьакхелла хилар, иштта таханарча вахаре из геттара эшаш хилар. Дакъа лоацаш хургья йоккхий промышленни моттигаш санна, коммерчески дизайн-студеш, бюрош. Яхьашка проекташ чуяла йиш я бархӏ оагӏонца – промышленни, унахцӏенон оагӏонцара кхоачам, хӏара дийнахьа вахаре эшараш; лаьттара, хи тӏара, фецара промышленни кхоачам; иштта кхыйолча машинашца дувзаденнараш.
Массехк оагӏонца дӏа-хьа нийсъергья толашагӏа йола проекташ, цу юкъе я «Серийни кхоачам», «Концепт-дизайн». Къаьстта моттиг дӏалоацаш ба «Къамо хержар» яха оагӏув – цу оагӏонцара толашагӏбараш Ерригача Россе онлайн хоржамашка гӏолла хоржаргба. Саькура бутт юкъекхаьчача хана, хургда из.
2027-ча шера бӏаьстан хьалхарча бетта 25-ча дийнахьа йовзаргья вайна дикагӏа болча дизайнерий, мехка толашагӏа йолча цхьацца кхоачам арахецача моттигий цӏераш. Яхьий керттерча сайте desӏgn-prom.ru электронни оагӏонца чудала йиш я дехар, иштта кхыдараш довза а.
