ДIоахалга диллача 84 метрахи, шорал ийс метри дола тIий меттадоаладе дикка къахьега дезе а, ер шу чакхдалалехьа болх йиисте баккха лаьрхIа ба къахьегамхой. Тоадаь даьлча тIий 96 метр дIаьха, 14,7 метр шера хургда. Гонахьа аьшкцеманта бIоагIий оттадаь, шаккъе оагIорахьа тротуараш дохкаш кийчдергда тIий.

«Керда тIий мелла дукха дозал йола машен кхераме йоацаш хургда. Из тоаде деза ха кхаьча тоъъла ха яр. Таханарча дийнахьа тIий, аварийни лоархIаш дар. «Кхераме доаца дика наькъаш» яхача къаман проекте гIолла укх шера 13 моттиг тоаяьй оаха, цу юкъе да 17 км чулоацаш дола ши тIий. Эггара чIоагIагIа гIадвугар да болхлоша шоаш дер хила боаггIача боараме делга, лерттIа кулг тохаш.

Ерррига объекташ юххьанца йилача хана дIачуяла аьттув хул. Шоай декхараш цу наха бехктокхаме чакхдахарах дагабоаллам боацаш дIадода деррига», — белгалдир ший къамаьла юкъе Мехкдас Келматнаькъан Махьмуд-Iаьлас.