Мехкдаь пресс-служба болхлоша яхачох, из беркате проект чакхъяккха федеральни бюджетера хьахьожадаьр 40,4 млн сом ахча да. Вай Мехкдаь фондера 2,1 млн къоастадаьд цу гIулакха. Келматнаькъан Махьмуд-Iаьлас ше тIахьожаш чакхдоккхаргда бошта гIо дар.

«Тахан вай керттера декхар — да, нана доацаш дисача берашта новкъостал дар, шоай доалахьа чу Iе фусамаш йолаш уж баха ховшабар. Иштта дог ийшача берашта дIахайта деза, паччахьалкхе цар уйла еш, дикагIа дар лохаш йолга. Федеральни нормативашка диллача 33 кв. метрах дола цIа доагIа царна, квадратни метрах 32,4 эзар сом хулаш. Вай республике фусама квадратни метрах латта мах 40 эзар сом ба.

Цунга хьежжа, бошта квартираш эцаш кхы а ахча эшаш хул. Республика Мехкдаь ца дича даргдоацача моттигашка гIо де хьакхеллача резервни фондера хьакъоастадаьд аз цу гIулакха 25 млн сом ахча», — аьлар Мехкдас Келматнаькъан Махьмуд-Iаьлас.