Вай мехкарча гӏо деш лелараша Цхинвалерча берашца гойтама болх дӏабихьар
Кӏалвисача сага эггара хьалхара гӏо дар мишта хила деза гойтар Къулбехьерча Хӏирий мехкарча 100 совгӏа долча бера. «Арт-перевал» яхача цӏихезача кхоллама доазон тӏа хилар из болх. Вай мехкарча МЧС колледжера хьехархой, студенташ бар дакъа лоацаш хиннараш.
«Сердалога» бенача хоамах, деррига хӏама ма дарра дӏагойташ болх хилар цох. Цӏаьхха, дагадоаца хатар нийсденна лозаваьча сага гӏо дарца эггара лоархӏамегӏа дола хӏамаш дар берашка дӏахьекхараш: дог сецача малагӏа болх дӏабахьа беза, кораяьча моллагӏча хӏамашца цӏий соцаргдолаш моттиг дӏаехкар мишта хила деза.
Манекенашца, тренажерашца из деррига шоаш мишта кхетадаьд хьахьокхаш хилар бераш. Вӏалла дагадоацача хана, берашта накъадала тарлуш дола хӏамаш да уж.
Лозаваьча сага фу де деза хар чӏоагӏа лоархӏаме да. Деррига ховш хиларал совгӏа, новкъостал де сихвала везача моттиге веха, корзагӏваьнна ца а хьовзаш, сихха гӏо де хьажар да лоархӏаме.
