Фотини яха гаьнаш дӏаегӏар Наьсарерча майдан тӏа
06.04.2026 09:37
Шин тайпара йола фотини оала гаьнаш дӏаегӏар Наьсарерча администрацена хьалхашка. Из хоам «Сердалога» бир мэре зарбан болх лелабераша.
«Деррига хӏама хоза тоалуш, хувцамаш долаш да укхаза. Бахархой, иштта хьаьший бӏарг хьоасташ хургйолаш, тоаеш латт шахьара моттигаш. Мэрена хьалхашка дӏаегӏа уж хоза гаьнаш йиъ метр лакха я», - йоах тхога бенача хоамо.
Шахьара да волча Оздой Руслана тӏабилла, дӏахьош ба из беркате болх.
Фотини яхар дуккхача шерашка яхаш, фо цӏендеш, шахьара моттигашка йоагӏаш, товш га я. Тайп-тайпара бесаш хувцалуш хул цун гӏаьнаш. Иштта хозал йолча гаьнаша геттара куц доаккхаргда шахьара керттерча моттига.
