Транспорта министерствос яхачох, наькъий болхлоша, организацеша лаьрххӀа йола 34 техника юкъеяьккхай, Ӏан замах нийслуш дола кхоачамбоацараш хургдоацаш. Цу юкъе я мухь тӀабувтта машинаш, автогрейдераш, массехк тайпа болх беш йола машинаш. Иштта наькъашкара хьал аттача даккхара, лаьрхӀа гӀум а тух а кхоачам боллаш ийцад Ӏанга кийчо еш.

Цул совгӀа, вӀашагӀбеллаб ден-бус ха дарца бувзабенна наькъ тӀара болх, транспорта министерствон сайта тӀа цох бола хоам ба, иштта юкъеяьккхай ГӀалгӀайчен ГИБДД, Паччахьалкхен хьем боаццаш йола штаб. Республикан Кулгалхочо Келматанаькъан Махьмуд-Ӏаьлас белгалдир, Ӏана замалахьа наькъ тӀа зулам хургдоацаш, из хаттар даим теркама юкъе хила дезилга.

Цо аьлар, нагахьа санна эшаш хуле, дагадоацаш наькъашкара хьал чоалхане дерзе, деррига наькъашка болх бу низаш юкъедоахаргда вай, аьнна. Ше мехка бахархошка кхайкарал деш, цо терко тӀаяхийтар, наькъа кхерамзле Ӏалашъяра, наькъа бокъонаш лораяра, машинашца лелараш шортагӀа хилара, Ӏан замалахьа лелаеш йола чархаш машинашта шоай ханнахьа дӀаоттае езаш хилара, машинаш шоайла юкъ юкъеюташ лелаяра, ГИБДД дӀаехаш йола бокъонаш лораяра. Юкъара кхерамзле Ӏалашъяр хӀара сагах тийша да, белгалдаьккхар цо.