Путин Владимира тешам беннача сага, кхетаче хилар колледжа студенташца
МЧС колледжа студенташца кхетаче дӀайихьар РФ президента вай республикерча тешам беннача Кхоартой ИбрахӀима. Кхувш боагӀарашта цо белгалдир Даьхен яхь лораярца дувзаденнараш.
Из хоам «Сердало» газетага бир «ЦаӀ йола Росси» яхача оагӀон зарбан болх лелабераша. Кхетачера керттера къамаьл дувзаденна дар хьатӀадоагӀача РФ президента хоржамашца.
«Берригаш раьза болаш, хоза дӀаяхар из кхетаче. Кагирхошта хьалхадаьккхар, мехка политически оагӀон вахаре цар дакъа лацар мел лоархӀаме да. Кхоартой ИбрахӀима дийцар, хоржамашка хӀара сага оаз лоархӀам болаш хиларах.
Мехка вахара хьал тоадара тӀехьа дакъа лоацаш хиларал совгӀа, цу лостамагӀа къахьегаш ше хьабенача наькъах дийцар цо кагирхошта», - хоам бу «ЦаӀ йола Росси» яхача оагӀоно. Цу вӀашагӀкхетара раьза болча кагирхоша белгалдир, мехка гӀулакха латта, цун сий лораде шоаш массахана кийча хиларах.
