ЖӀайрахьа кхален 30 шу дизар дездеш да
09.10.2023 10:59
ЖӀайрахьа кхален 30 шу дизар дездеш да. Из хьакхеллай 1993 шера ардара бетта 8-ча дийнахьа ГӀалгӀайчен президента Овшанаькъан Руслана амарах, ГӀалгӀай паччахьалкхе хьакхеллача кердача ханагара дӀайолаенна. Бакъда цу моттига исторен овла гаьнарча бӀаьшерашка кхоачаш ба, из хьагойт таханарча денга кхаьча латтача тӀо буллаш хьалъеттача гӀалгӀай тайпай гӀалаша. Тахан ЖӀайрахьа кхале дика дегӀадоагӀаш а, наха цӀихеза довзаш а дола доазув да.
ТӀеххьарча массехк шера кхаленна тӀехьара тӀа лоаттадеш дола новкъостал 94 процентагара, 39 процентага кхаччалца лаьгӀде таро хиннай.
Укхаза болх беш я шера моллагӀча хана салаӀа йиш йола «Iармхи» яха курорт, хьаьшашта салаӀара лаьрхӀа дола итт цӀа, цхьа ткъаьх юртбоахам, «Кавдоламит» оала ГУП. Хьайбаш, нокхарий леладар а дика дегӀаденад укхаза. ЖӀайрахьа кхале юкъейоагӀаш я юртара доазув тоадара йолча къаман проекта.
ТӀеххьарча шин шера Олга тӀа хьалъяьй 250 бера лаьрхӀа йола ишкол, Лаьжге - культуран цӀа, Лаьжге, Хьуле спортивни майдаш. Культуран цӀа хьалдеш латт ЖӀайрахьа. Кхален бюджетерча ахчах 20 эзар метр керда хин турбаш чуяьхкай. Ерригача юрташка 90% асфальт биллаб. Деррига дахчан тока бӀоагӀий, аьшкасаьргаш хийцад. Урамашка сердал чуйиллай. ТӀехьара тӀа нувхаш дӀакхувса моттигаш а тоаяьй»,-аьлар «Сердало» газетага ЖӀайрахьа кхален администраце кулгалхочо Лаьнанаькъан Ахьмада.
Лоамара ЖӀайрахьа кхале тоаяра дӀахьош долча балхаша цун куц-сибат хийцад. Из дикка туристий безам тӀагӀоргболаш тоалуш йоагӀа. Карарча шера республике туристаш 100 эзар совгIа саг хиннав.
