Хьогала Ӏазап озаш долча хьайбашта гӀо де, яхаш, кхайкарал ду экологаша
Вайцигарча бахархошка, хьаьшашка интернете гӀолла кхайкарал ду; укх Ӏимецача хана, хьогало кӀалдита лелача хьайбашта гӀо де, яхаш. Из хоам «Сердалога» бир Ӏалама гӀулакхах йолча министерствера.
«ХӀара ди +30 лакхагӀа йӀовхал отташ хул вайна. Адамал халагӀа да иштта дола дӀайха денош ла хьайбашта. Да воацаш лела хьайбаш Ӏийне довла гӀерташ, хи къург лохаш, Ӏазапе отт. Моцалал халагӀа я хьогал!» - йоах министерствон болхлоша.
Бахархошта хьалхадоаккх; шоаш дахача моттигашка, карта йистошка хий Ӏоувттадаро маьл хулийтаргба шоана, яхаш! ЦӀаккха а диц ма де миска хьайбаш, Дала къахетаме хила йоах вайга.
ЧӀоагӀа дега тоам хулаш, белгалде лов, вай мехкарча дуккхача наха ара лелача цискашта, жӀалешта ялат увттадеш, цар терко елга. АллахӀа низ лулба вайна, дика гӀулакхаш доаржаде!
