Ерригача ГӀалгӀайчен говзанчаш гулбир «Халкъий доттагӀал» яхача фестивало
ЦхьоагӀон ди долаш, Россе къаман культуран «Халкъий доттагӀал» яха фестиваль дӀайихьар ГӀалгӀайче. Цига республикан массайолча миӀингашкара баьхка хилар дикагӀа бола говзанчаш, яхаш, дийцар «Сердало» газетага кхетаче вӀашагӀъеллараша.
«Наьсарен-Шахьара культуран ЦӀагӀа говзанчий гойтамга хьажа вена хилар ГӀалгӀай Республикан Халкъа Гуллама кулгалхо ТӀумхой Мухьмад, ГӀалгӀай Республикан культуран министр Лаьнанаькъан Залина, паччахьалкхен боахамий викалаш, юкъара болх лелабераш, политикаш. ГӀалгӀай Республикан кулгаговзала Ассоциаце доакъашхоша кхелла хӀамаш хинна ца Ӏеш, «Хьалхарчар болам» яхача берийи кагирхойи Ерригроссе хинар дарий а, шоаш хӀама хьадеш болча юртахой а балхаш го йиш хилар фестиваль йолаш.
Хьажархой таро хилар, цӀастах, дошох, топпарах хьаяь хӀамаш йовза. Шоай хоза кхоллам гойтар укхаза суртанчаша, исбахьален балхаш леладераша, иштта хӀанзарча ханара искусствох пайда эцаш, эпоксидни кӀувнах хӀамаш хьаераша. Гулбеннарашта дика совгӀаташ дир мерзача хӀамашца, тайп-тайпарча мерзача маларашца, къаман даарца - мерзача дугаца», - аьлар тхога хоам баьчо. Ди йистедоалаш, ГӀалгӀайчен говзанчий Ассоциаце президента Галай Адама массанена, дика къахьегарах, совгӀаташ делар.
