МагӀалбикерча гимназе дешархошта гойтар, ГӀалгӀайчен кадетий корпусах дола фильм
МагӀалбикерча №1 йолча Чахкенаькъан СаӀида цӀерагӀча ишколе гойтар «Кадет-сий, яхь, цӀи!» яха, Цхьорой Ӏаддала цӀерагӀча ГӀалгӀай Лоаман кадетий корпуса 30 шу дузаш хилара хетадаь фильм. Из кхетаче кийчъяьяр шахьара культуран цӀено. «Дешархошта культура» яхача Ерригроссе проекта чуйоагӀаш яр из.
«Кадет - сий, яхь, цӀи!» яха фильм шоай мехка бизза къонахий, даьй хила безам болча кагирхойх дола дувцар да. Цо дувц, йоккхача халонех чакхбоалаш, бакъда юха ца боалаш, шоаш лаьрхӀачунга кхачара тӀакхувш хьабоагӀача кадетех. Цу фильмага хьежача, уйла чуйосс, ший Даьхе езаш хилар, визза къонах хилар, шийна хетар, ше лаьрхӀар чакхдоаккхаш хилар фуд», - аьлар «Сердало» газетага МагӀалбик-Шахьара культуран цӀен кулгалхочо ГӀазданаькъан Мухьмада.
Белгалдоаккх, ГӀалгӀайче Лоаман кадетий корпус вӀашагӀъеллар 1994-ча шера республикан хьалхарча президента, Советски Союза Турпала Овшанаькъан Руслана амарах.
