«ГIалгIайче- Къилбаседа Кавказа жовхьар» яхача видеоткрыткага гIолла цигарча берашта цар дийцар, вай мехка исторех, культурах, хозача моттигех. «Магасе ноаношта оттадаьча сийленга юхе, Магасерча гIала чу, Алане коа, музейшка дIаяздир вай гимназисташа шоай видеооткрытка. Безаме, цар дегаш тедеш къамаьл дахьийтар цар Донецкерча дешархошка. Цу проекта керттера декхар - Россе моттигашкарча берашта юкъера барт, безам, бувзам чIоагIбар. Из хоам «Сердало» газетага бир паччахьалкхен музея кулгал деча Саганаькъан Мухьмада. «Хьажал, ер Росси я» яхача проекто берашта аьттув беннаб шоайла довза, бувзам лелабе. Тайп-тайпарча къамий Iадаташ, оамалаш йовза йиш я цар. Боккхача мехка моттигаш лархIа, шоай Даьхенах доаккхал де Iомаду цу гIулакхо бераш.