«Западни оалача урам тӀа жагӀа тоссаш, никъ тоабайтара тӀехьа гӀо де, яхаш, яр СоагӀапчара БахаевгӀар Лида. МагӀалбика кхален администрацена кулгал деча Къоастой Ӏаддал-Хьамида хьатӀабоагӀача бетта юхье кийча хургба никъ, аьнна, чӀоагӀо елар тхона», - аьлар вай Мехкадас.

Иштта, Наьсаре вахача Далганаькъан Наипа дехар дир, Далганаькъан Уцига Малсага аллея Магасерча 27-ча даькъ тӀа хьаеллийта гӀо де, аьнна. ХьатӀабоагӀача бетта 20-ча дийнахьа цу гӀулакхах лаьрхӀачох хоам бе безаш ва Магаса мэр Орцханаькъан Зайт.

ХьатӀабоагӀа бутт йистебалале, тоабаь хила безаш ба Заьзгакъонгий-Юртара тайп-тайпарча балха моттигашта юхера никъ, МагӀалбика кхалерча хьакимаша яхачох. Из дехар Мехкадаьга дир Бисайнаькъан Султана.

Мужечара депутат волча Гандаранаькъан Ахьмада юртахошкара кодадир; 1940-ча шера кхеллача Орджоникидзе Сергой цӀерах йолча музея ший гӀишло яц, аьнна. ДӀадахача бӀаьшерашкара лакха мах бола хӀамаш я цу музее.

Тахан уж яда моттиг - юртара ишкол я». Мехкадас белгалдир, цу тайпара хӀамаш вай къаманна боккха лоархӀам болаш хилар. Культуран гӀулакхах йолча министерствон хьалхалаттача Лаьнанаькъан Залинайна тӀадиллар, из деррига гӀулакх тахкар а, цох дола каьхаташ бӀаьстан кхоалагӀча бетта юкъе кийча хилийтар а.

Мехка хьакимашта, иштта бахархошта эггара лоархӀаме хетараш да, вахара хьалашца дувзаденна хаттараш.