«ЦхьоагӀо хиларца, вай низ ба. Ираз, машар, дикадар хилар лов сона; ГӀалгӀайчен дукхача къамий бахархошта. Вай цхьана долча хана, вай дохалургдац!» - аьлар ГӀалгӀай Республикан Кулгалхочо ший телеграм-канале гӀолла. Цо иштта белгалдир, халкъа барто, цхьоагӀо хилара дено вай хьамсарча боккхача мехка бахархой вӀашкаоз. Карарча хана ГӀалгӀайче бахаш, дешаш, къахьегаш ба 17 къаман викалаш. Цар хьагойт шоаш барт-цхьоагӀо долаш бахаш хилар. «Тахан из цӀай, вӀалла ца хиннача тайпара, лоархӀаме да. ХӀара российски халкъа денал, майрал бахьан долаш, тахан духьалъэттад вай моастагӀчунна, цунца Россе хургдола вахар лора а деш», - аьлар, ше кхайкарал деш, Келаматанаькъан Махьмуд-Ӏаьлас. ГӀалгӀайче, лайчилла бетта 4 -ча дийнахьа, цу лоархӀамеча цӀайна хетаяь тайп-тайпара кхетаченаш дӀахьоргья, уж паччахьалкхен лоархӀамеча цӀайна хетаяьй. Цига, мехка бахархоша доаккхал а деш, дувц хьамсарча паччахьалкхенна карагӀдаьннача дикача гӀулакхех.