ГӀалгӀайчен Кулгалхочо аьлар, Осканаькъан Сулумбик кагирхошта дика масал да
ГӀалгӀайчен кулгалхочо Келаматанаькъан Махьмуд-Ӏаьлас, 32 шу хьалха венна лётчик, Россе Хьалхара Турпалхо Осканаькъан Сулумбик кагирхошта дика масал хилар белгалдир, яхаш, хоам бу «Сердало» газетага мехка кулгалхочун зарбан болх лелабераша.
«1992 шера саькура бетта 7-ча дийнахьа гӀалгӀай лётчика-истребитела турпалал гойтар, ший са ца кходеш, цо кӀалхарбаьхар Липецки областа бахархой, цар цӀенош тӀа чудожа тарлуш дар фецара кема.
Цу тайпара денал долаш саг атта хургвац. Цун вахар а валар а, мах баь варгвоаца масал хинна, дӀаэттар. Липецки областа Хворостянка яхача юртарча наха цӀаккха а дицлургдац, шоай вахар кӀалхардоаккхаш, цо ший са Ӏодилла хилар»,- аьлар Махьмуд-Ӏаьлас, из дика, денал дола саг дагалаьца.
Цо иштта белгалдир, авиаце инарал-майор массаволча гӀалгӀачунна гаргара саг ва, лерттӀа саг волаш дӀабихьар цо вахара никъ, иштта вар из массахана ше вахача а болх беча а моттигашка.
Келаматанаькъан Махьмуд-Ӏаьлас белгалдир, ГӀалгӀайчен кагирхой кхычахьара турпалхой леха безаш бац, дика масала эцара; вай республике ба турпалхой, царех цаӀ ва Осканаькъан Сулумбик.
Ткъаь шийтта шу дӀадаьннадале а, ГӀалгӀайчен бахархошта тахан санна дагавоагӀа из дика саг, шоай цӀагӀара саг санна из лоархӀаш.
