«Махьмуд-Ӏаьлас дийцар, керда шу хиларца дувзаденна цӀай дола денош дӀадахьарах; берашта лаьрхӀа, салоӀа денош долча хана, кхетаченаш вӀашагӀйохкарах лаьца. Цо хьалхадаьккхар, къаьстта терко тӀаяхийтар таро йоацача дезалашта, берашта-заӀапхошта, СВО бӀухой берашта. Цу тайпарча фусамашка уж болхе, кердача шера цу берашта доккха совгӀат хул», - аьлар цо. Келаматанаькъан Махьмуд-Ӏаьлас иштта массайолча балха моттигашта тӀадиллар, нах салоӀаш болча деношка газ, сердал, хий ца хаддаш хилийта, аьнна.

«Вай лаьрххӀа вӀашагӀъелла тоаба я, дагадоаца хьал этта хуле, цунна оарцагӀъяргйолаш. Из а дац кхоачам болаш, хӀара доал деча юрта ха деш, телефонаш а йолаш, нах хила беза, бахархой таро хургья царга гӀолла шоай дешаш дувца», - аьлар республикан Кулгалхочо. Цо тӀахьийхар цу гӀулакха бехктокхаме бараш, наьха хьашташ кхоачашдара, шоаш болча даькъ тӀа экологе таронаш лораяра.

«2024 шера царгара хьабехаргба коммунальни ахча гулдара, административни комиссе баь болх»,- аьлар Махьмуд-Ӏаьлас. Иштта цо белгалдир, шоашта лоаттадаьча коммунальни хьалех дола Ӏаьдала ахча дӀадала дезаш хилар. Наха хьалхадаккха деза, цхьаккха халонаш а йоацаш, каьхаташ доахаш ха йоае а ца езаш, ший ханнахьа ший фусам хьатӀаязъе а, ЖКХ хьалех доагӀаш дола Ӏаьдала ахча дӀадала а, кхыйола таронаш лелае а уж йиш йолаш хилар.

«Нагахьа санна наьха хьашташ кхоачашдара вай накъадолхаш хилча, цар а иштта кхетадергда вай шоашкара хьадехар. Уж деррига дешаш къаьстта са теркама юкъе хургда», - аьлар ГӀалгӀай Республикан Кулгалхочо.