«Кхетаче дӀахьош промышленноста, юртбоахама даькъ тӀа инвесторий болх беш хиларах дийцар: «Сунжа» агрокомбинат, хьоар доаккха завод, кӀала хӀамаш еча даькъ тӀа, кхыйолча моттигашка. Новак Александра белгалдир; ГӀалгӀайче хӀама хьадеш хилар лакхача боараме да, аьнна. Уж толамаш даха таро хиннай, цхьайола программаш кхоачашъярца: юхасайца латташ хинна предприятеш дӀайолаялийтарах, мехка бахархой шоай доалахьара зӀамига, йоккха бизнес дегӀайоалаеш хиларах, цар хьалха луш хинна йоал 6 процентагара» 2 процентага кхоачаш лохъенна хиларах, бахархоша дукхагӀа шоай доалахьара хӀама хьадоладаь хиларах, иштта кхы а дукхача бахьанех», - аьлар ГӀалгӀай Республикан Кулгалхочо ший телеграм-оагӀон тӀа. Дийцача къамаьлах вице-премьера тӀадиллар юртбоахама министерствонна, иштта Россельхозбанка, Сбербанка, «Южный» яхача оалхазарий комплекса, гӀишлошъяра министерствонна льготни кредит далара хьалаш Ӏалашдар, иштта ГӀалгӀайчен МагӀалбика кхале хий цахилара дош кхоачашдар, цу даькъ тӀа нийслуш дола кхоачамбоацараш юстардахар. «Белгалдаккха безам ба, Новак Александра массаза а тха хаттарашта терко лоаттаю, цу юкъе даим дакъа а лоац. Цо деш дола гӀо хоалуш а да, цунах оаха баркал а оал цунна, мехка иштта терко еш хиларах», - аьлар Махьмуд-Ӏаьлас. Федеральни оагӀорахьара новкъостал лоаттадеш хиларах, ГӀалгӀайче дика кхоачашду социально-экономически дегӀаахарца дувзаденна вайна хьалхашка латта керттера декхараш.