«Вай дикка гаьнадаьннад цу гӀулакха! «Кхераме доаца дика наькъаш» яха къаман проект укх пхе шера, оттаяьча ханал хьалха кхоачашъю вай. Укх шера хьалхарча ялх бетта дикка болх дӀабихьар республико цу лостамагӀа. Оттаяьча ханал ах шу хьалхабаьлар вай мехкара наькъаш тоаду болх», — белгалду Мехкадас ший телеграм-каналага гӀолла. Чакхдаьхача доккхача балхашта юкъе да Эккажкъонгий-Юртара тӀий, лоархӀаме дола дукха наькъаш. Мехкадас хьаохадир, из болх дӀахо а иштта дӀабахьа беза, аьнна. «Наькъаш тоадеш къахьегаш боахкараша шоай декхараш бехктокхаме кхоачашдеш хилар, шоай болх царна безар да», — белгалдир республикан кулгалхочо. «Баркал хилда царна иштта бехктокхаме къахьегарах! Шоай гӀулакх цар иштта дика дӀахьош хиннадецаре, таханарча хьалага кхача аьттув хургбацар вай», — аьлар Мехкадас.