ГӏалгӀайчен Кулгалхочо белгалдир, мехка дика наькъаш хилар
ГӏалгӀай Республикан кулгалхочо Келаматанаькъан Махьмуд-Ӏаьлас даькъалабийцар наькъа боахама болхлой, цар профессиональни цӀайца, цо белгалдир республика дегӀайоалаеш, мах баь варгвоаца дакъа цар юкъедена хилар.
Цар къахьегам бахьан долаш, ГӏалгӀайче укх массехк шера лакха толамаш гойташ я «Кхерамзлен дикал йола наькъаш» яхача проекте, Россе гӀолла хьалхара моттигаш йоахаш, планаш кхоачашъярех а я; говзанчаш шоай моттиг йовзаш а бехктокхаме хилар а да из, аьнна, белгалдир цо.
Махьмуд-Ӏаьлас баркал аьлар наькъий къахьегамхошта, атта боацача балха тӀа лакха толамаш дахарах. Къаьстта уж бахьан долаш хьакхоллаш да шахьараш, юрташ шоайла ювзаш дола дикал йола наькъаш.
«Вай тахан ала йиш йолаш да Къилбаседа Кавказе вай наькъаш дикагӀчарна юкъе да. Хӏара асфальта километра тӀехьа, наькъаш тӏа къахьегарий боккха болх латт», - аьлар ГӏалгӀайчен Кулгалхочо. Цо баркал аьлар цу боахама ветеранашта, болхлошта. Ловца баьккхар, дӀахо а толамаш доахаш, ГӏалгӀайчен наькъий хьалаш тоадеш, могаш долаш, паргӏатонца дахалда шо, аьнна.
