Палестинерча наха гӀо дечарна, доккха баркал аьлар Мехкадас
Палестине халача хьале эттача бусалба наха новкъостал деча бахархошта, доккха баркал оалаш, къамаьл дир вай Мехкадас Келаматанаькъан Махьмуд-Ӏаьлас. Из хоам «Сердало» газетага бир республикан кулгалхочун зарбан болх лелабераша.
«Вай къаман нах массахана хиннаб оагӀув хьаллацара, гӀо дара кийча болаш», - язду Мехкадас ший телеграмм-канале. Цо белгалдир, иштта къахетаме, камаьрша хиларо, моллагӀа хало тӀакхаьчача, сатоха, сабаре хила вай къаман наха гӀо даьлга.
БӀарчча дезалаш, тоабаш оарцагӀъяьлар Палестинерча мискашта новкъостал де. Дукха хӀамаш, миллионнаш рузкъа гулде вӀаштӀехьадаьлар вайцига.
Мехкадас белгалдир, уж еррига хӀамаш дӀаяхьийта кийчъеча гӀо деш лелараша, бахархоша доккха дакъа лаьцалга. ХӀаравар цу наха новкъостал хургдар де гӀерташ, царех дог лазаш вар.
